بصباح هالأحد المبارك اللي فيه عم نتأمَّل لقاء الملاك بالعدرا مريم، منرفعلك يا إلهنا القدّوس كلّ المجد والإكرام ومنشكرك على حُبَّك اللامتناهي لإلنا.


عظيم إنتَ يا الله الآب السماوي، بعتِت الملاك جبرائيل لعند العدرا مريم، هالصبيِّة اللي كرَّسِتلَك حياتا بفعل حُبّ وإيمان، تا يعطيها سلامك ويبيِّنلا قدَّيش حُبَّك كبير لإلها وللبشريِّة، بفعل البشارة بتجسُّد الله الإبن يسوع بأحشاءا الطاهرة.


عظيم إنتَ يا الله الإبن الحبيب يسوع المسيح، الكلمة المتجسِّدة بأرضنا وبقلوبنا، إنتَ اللي جيت تا تعطينا الخلاص وتشيلنا من خطايانا.


منشكرك عا فيض حُبَّك إلنا اللي خلّاك تشابهنا بكلّ شي ما عدا الخطيِّة.


عظيم إنتَ يا الله الروح القدس المُعزّي، مبدأ حياتنا الروحيِّة.


إنتَ اللي حلَلت عالعدرا مريم، وبقوتك حِملِت بأحشاءا الربّ يسوع.

منشكرك لأنَّك عم تشرق بقلوبنا نور المسيح تا يشعّ، من خلالنا، عا كلّ إنسان ناطر لمسة حُبّ الله وحنانو ورحمتو بحياتو.

/الخوري يوسف بركات/