منرفعلك يا ربّ كلّ التسبيح والمجد والشُكر عا كلّ نِعَمَك وعطاياك اللي بتفيضا علينا بهالصباح المبارك.

إنتَ بتعرف يا ربّ قدَّيشنا تعبانين بهالحياة، نحنا بحاجة لصدر أمين نتِّكىء عليه بثقة، ولصديق حنون نجي لعندو ونشكيلو، ولكتف يشيلنا ويحملنا من تقل هالوضع الصعب اللي عايشينو.

مين إلنا غيرك يا ربّ البَيّ المحِبّ القادِر يحملنا، نحنا أبناءو وبناتو، بقلبو وبعيونو، ومستعد إنّو يحمينا وينقلنا من الضغط النفسي للسلام الداخلي بكلامك المُريح والمليان حياة ورجا.

يمكن بأوقات، بسبب ضعفنا، ما منحسّ بحضورك المادّي، بس نحنا أكيدين من إننا منسلّمك قلوبنا وذواتنا تا نكتشفك ونعرفك أكتر وأكتر ونقدر نتِّكل عليك تا تحمل معنا الصليب وتخلّيه خفيف.

كيف ما رح يصير الصليب خفيف وإنتَ الحبيب اللي حامِلنا مع صلباننا؟ كلنا إيمان بإنّو أحمالنا التقيلة ما بيشيلا إلّا الحُبّ المتجسِّد فيك يا ربّ.

/الخوري يوسف بركات/