بهالصباح المبارك، ومع إطلالة هالنهار، منسبحك ومنعظمك ومنمجّدك يا ربّ واهب المواهب وعاطي العطايا.

يا يسوعنا الحبيب، كتير بيحكمو علينا الناس، وخاصَّةً أهلنا وقرايبيننا.

هنّي ما بيعرفونا وبدُّن يانا نكون متل ما هنّي بدُّن ومش متل ما نحنا بدنا نكون.

وإنتَ كمان، وقتا كِنت عا أرضنا، عانَيت من عدم إيمان الناس فيك، حَتَّى اللي قراب مِنَّك شكّو فيك لدرجة إنُّن تركوك وتركو الرسالة معك.

ونحنا يا إلهنا الحبيب، بهالوضع اللي نحنا فيه عم نتجاذب بين الثبات فيك وبين رغبات الحياة اللي عم تضغط علينا تا نزيح عن طريق قناعاتنا كمسيحيّين وعن المشي بطريقك.

اعطينا يا ربّي يسوع الحكمة تا نعرف نميِّز الصح من الغلط بحياتنا ونختار العيشة معك، والقوِّة تا نقدر نكمِّل بالعيش بحسب تعاليمك اللي بتخلّينا نواجه الخطيِّة ونتغلَّب عليها ولو بصعوبة.

ثبِّتنا يا ربّ تا ننما بِحُبَّك.

/الخوري يوسف بركات/