منسبحك ومنعظّمك ومنمجدك ومنشكرك يا ربّ عا كِلّ نِعَمَك وعطاياك اللي فضتا ودايماً بتفيضا علينا بحياتنا.

في أجمل من إننا نكون أطفال بعينيك يا ربّ؟

مهما كبرنا، وقد ما صارت أعمارنا كبيرة منبقى صغار بعينيك لأننا ولادك اللي بتحبنا يا إله المحبِّة.


ونحنا اللي عنّا ملء الإيمان فيك يا يسوع، رح نسعى إننا نبادلك هالمحبِّة من خلال محبِّتنا بعضنا لبعض، وهيك منكون عم نشوفك بعيون مليانة رجاء وإيمان بحضورك الحقيقي فينا.

وشو حلوة هالتطويبة اللي بتعطينا ياها لمَّن منسعى تا نشوفك بالآخر، ونسمع كلمتك بالكتاب المقدّس ، ونعمل بوصاياك المقدَّسة يا يسوعنا الحبيب.

يا يسوع، اللي بيحب بيسعى، بكلّ ما عندو من قدرات، على إنّو يفرِّح اللي بيحبّو، ونحنا كتير منحبَّك ورح نحاول إننا نكون متل الأطفال ، نسلّمك ذاتنا لأنَّك بيّنا، ونوثق بإنَّك دايماً معنا وحدّنا بكلّ الأوقات، ورح نعمل كلّ اللي إِنتَ بتحبّو تا تكون مبسوط فينا.

/الخوري يوسف بركات/