مع إشراقة نورك يا ربّ بهالصباح المبارك، منرفعلك التسبيح والتمجيد والشكر عا كلّ نِعَمَك وعطاياك.

دايماً يا ربّ، منفتِّش عا إرادتك بحياتنا، نحنا اللي منآمِن إنّو في عنّا رسالة بهالحياة بس ضايعين ومش عارفين أيّا طريق بدنا نمشيه صوبك.

مرّات كتيري منفكِّر حالنا إننا نحنا اللي عم نفتِّش عنَّك وإنَّك بعيد، منلاقيك إنتَ اللي عم بتلاقينا وين ما كِنّا وكيف ما كانت حالتنا.

إنتَ يا ربّي اللي بتجي بتزورنا، لو شو ما كان وضعنا.

بتفتِّش علينا بضعفنا وبخطايانا، بغربتنا بهالحياة وبِبُعدنا عنَّك وعن وصاياك.

عظيمة طرقك وأحكامك يا ربّ، إنتَ اللي شفيت بنت المرأة الكنعانيِّة بمُجرَّد ما طلبت منَّك الأم بإيمان إنَّك تخلِّصلا بنتا، وإستجبت قدّام إيمانا القوي.

يا ربّ، عطينا هالإيمان الحيّ اللي عند الكنعانيِّة.

علِّمنا، بشفاء الكنعانيِّة، كيف نتِّكل عليك لأنَّك إنتَ القادر عا كلّ شي، وكيف نِلمُس حُبَّك بحياتنا.

/الخوري يوسف بركات/