أجمل ما في بالكون هوّي نورك اللي بتشرقو علينا كلّ صباح يا ربّ.

المشكلة اللي منوقع فيها دايماً يا ربّ، هيّي إننا منصير نصنِّف الناس ومنحطُّن بدائرة الإتِّهامات ومنصير ندلّ عليهن بالأصابع معتبرين حالنا نحنا بحالة القداسة وغيرنا بالخطيِّة، وحتَّى ما منعرف إذا خِطيو أو لأ، أو حتَّى ما منعرف شو خَطيِّتن، والأتعس أوقات منصير نركِّبلن خطايا، المهمّ نحطُّن بخانة الخطيِّة.

كل هيدا وبعدنا ما عم نعرف ناخد من الأحداث، اللي عم بتصير معنا وبالعالم، العبرة إننا نكون دايماً عم نشتغل عا خلاص نفسنا بدل ما نلتهي بالآخرين، ونكون مستعدّين دايماً لساعة الصفر اللي فيها رح نوقف وِج بوِج قدّامك يا ربّ وناطرين مِنَّك الكلمة الأخيرة والحُكم الأخير.

يا ريت منرجع أطفال صغار بإيماننا يا ربّ تا نضلّ بحاجة لكلمتك تعلِّمنا فيها كيف نتقدَّس ويتقدَّسو اللي حويلينا.

/الخوري يوسف بركات/