يا ربّي يسوع، شو بتفرح قلوبنا لمَّن بتدعينا إنّنا نكون أغصان فيك، إنتَ الكرمة الحقيقيِّة والجيدة اللي بتعطي ثمر جيِّد وطيِّب.


وشو كبيرة هالمسؤوليِّة يا ربّي يسوع، إننا نحافظ على هالكرمة وهالثمار إنها تبقى جيدة، وما نكون أغصان عاقرة وما بتنتج ثمار بتليق فيك.


والويل إلنا إذا ما رح نكون عم نعطي ثمارك، الغنيِّة بالمحبِّة والفرح والسلام والتواضع والخدمة والتضحية وبذل الذات وغيرن.


لأنّو من دونن رح نكون يابسين وما إلنا أصل ونهايتنا البُعد عنَّك.


يا روح الله القدُّوس ، ملّينا مِنَّك ونقّينا من كل شي بيبعدنا عنَّك وعن الآب والربّ يسوع المسيح، ودوِّبنا بنار الحبّ الإلهي تا نكون شهود لإلك حقيقيّين كل إيّام حياتنا.

/الخوري يوسف بركات/