مع إطلالة هالصباح، ومع إنطلاقة هالأسبوع المبارك، منرفعلك يا ربّ التسابيح والمجد والإكرام.

منفتح يا ربّ قلوبنا وعقولنا لتمجيدك يا ربّ، متل ما فتح زكريّا تِمّو وعقلو ومجَّدَك بلسانو وباركك يا إله الآلهة.

ومتل ما عظَّمَك زكريّا يا الله، من بعد ما ملّاه الروح القدس وصار يعلن رسالة يوحنّا إبنو اللي بدّو يجي ويهيّء الطريق للمجيء المُنتظر، يوحنّا اللي رح يعلِّم الشعب إنّو الخلاص ما بيِجي إلّا بتوبة حقيقيِّة وبسلام داخلي.

علِّمنا يا ربّ بهالنهار المبارك إننا نِنما ونتقوّى بالروح القدس على مثال يوحنّا، ونِنما بالنعمة والقامة والحكمة تا نوصل للقداسة.

يا ريت بيكون عنّا، حرّاس بتبعتلنا ياهُن تا يكونو حُرّاس عا بواب قلوبنا وشفافنا تا ما نوقع ونتعثّر ولا نحكم عا حدا ولا نشهِّر بحدا، ولا ندين حدا.

خلّي لساناتنا ترنِّم بتمجيدك وتكريم العدرا والقدّيسين دايماً.

/الخوري يوسف بركات/