شو حلو النهار اللي بيبلِّش بتمجيدك وبيكمِّل بتسبيحك وبينتهي بتعظيمك يا ربّ، يا إله السما والأرض.
ما بعرف ليش يا ربّ صارو أغلب الناس عم بيفكرو بالكراسي والمقاعد، ويتنافسو على مين بدّو يكون الأوَّل، وبيصيرو يسعو تا يوصلو، ولو عا حساب وكرامة غيرن، بس المهمّ يوصلو.
ونحنا اليوم يا ربّ، جايين لعندك من تاريخنا وعالمنا وأوجاعنا وآلامنا ونقايصنا وأفراحنا.
جايين لعندك وكلنا إستعداد تا نلتقي فيك وتغمرنا رحمتك وكلمتك تعصف فينا لأنَّك وحدك اللي عندك السلطان والقدرة على إنَّك تصنع المعجزات.
روحك القدّوس يا ربّ هوّي مُعزّينا وما بينسانا، تعا يا روح الله وفوت عا قلوبنا وغسِّلا وطهِّرا تا تفرح فيك ومعك، ونسمعك عم تهمس فينا بكلامك المليان حياة.
نعم يا ربّي يسوع نحنا منعرف إنّو سلطتك هيّي من عند الآب، وإنّو كل اللي للآب هوّي إلك، علِّمنا إنّو نعيش تحت كنفك ونعمل مشيئتك ونحبَّك حُبّ ما إلو حدود.
