منرفعلك يا ربّ قلوبنا وحياتنا وعائلاتنا، بهالصباح المبارك، تا تباركا وتقدِّسا طيلة هالنهار ونكون عم نعرف نمجّدك بكلّ لحظة منعيشا اليوم وكلّ يوم.

ومتل ما كلَّمت شعبك قديماً وقدتُن للخلاص، هيك كمان عم بتحكينا نحنا المعمَّدين اليوم يا ربّ وتدعينا إننا نتمسَّك فيك ونلتجي لإلك تا ننال الخلاص فيك.

يا يسوعنا الحبيب، تعا وفوت عا تاريخنا وحياتنا، تا نعرف نسمع كلامك ونحملو بحياتنا ويكون نهج وطريق منمشي فيه صوب القداسة، ونكون من خلالو رُسُل سلامك بالمحيط اللي عايشين فيه وبالعالم.

يا ربّي يسوع، العالم الأرضي بضياع تام، ما بيعرف شو بيريد، هوّي متل هالصبيان القاعدين بالساحات وما بيعجبن العجب، لا باردين ولا حارّين، ودايماً عم يتأفَّفو من الحياة، ما بيضحكو بالأفراح ولا بيحزنو بالأحزان.

يا ربّي يسوع، عطينا من حكمتك تا نعرف ناخُد القرارات اللي بتليق فيك وبتمجّدك، وتكون ثمرة أعمالنا هيي حُبّ وفرح وسلام فيك يا ربّي الحبيب.

/الخوري يوسف بركات/