صباح المحبِّة والفرح والسلام هوّي الصباح اللي بيبتدي بنورك يا ربّي يسوع.

يا يسوعنا الحبيب، إنتَ عم تدعي كلّ واحد وواحدة مِنّا تا نتبعك ونكون تلاميذك، ونحنا دايماً على إستعداد لهالدعوة رغم ضعفنا يا ربّ.

بس إنتَ بتعرف يا إلهنا الحبيب إنّو هالمُهمِّة مش هينة، لأنّو مش دورنا الحقيقي كتلاميذ لإلك إننا بس نخلِّص أنفسنا ، ولكنَّك عم تدعينا للأهمّ وهوّي إننا نُخلَص نحنا وكلّ إنسان منجيبو لعندك.

يا ربّي يسوع، متل ما ضوّيت لليهود على الظلام اللي كانو عايشين فيه، ودعيتُن تا يرجعو لإلك إنتَ النور اللي بيضوّي عتمات الحياة، وكشفتلُّن أعمالن الشرّيرة بمجيئك، هيك نحنا يا ربّ، من دونك حياتنا ظلام وأعمالنا بيلبسا الشرّ بكلّ أنواعو.

أعطينا يا ربّ النعمة إننا نتِّحد فيك يخلينا ما نعمل إلاّ اللي بيفرح قلبك، وإحفظنا بالنور تا نكون من أبناء النور ونعيش وكل هدفنا نرضيك يا عريسنا السماوي.

/الخوري يوسف بركات/