بصباح هالنهار المبارك، منرفعلك يا ربّ التسبيح والمجد والإكرام والشكر عا حضورك الدايم بحياتنا.

يا يسوعنا الحبيب، دايماً منوقف مدهوشين قدّام سِرَّك يا ربّ وقدّام حكمتك إنت اللي عطيتنا ذاتك وضحَّيت فيها، بِحُبّ، كرمال نقوى فيك ونتمثَّل بالحياة اللي عشتا معنا يا ربّ، ونكون صورة عنَّك يا إله الكون.

وتا نكون صورة عنَّك يا ربّ، بدنا نعيش بحسب تعاليمك ونغرف من نبع النِعم يا نبع الحنان وبحر العطايا، يا ربنا يسوع إلهنا الحبيب.

يا يسوعنا الحبيب، إنتَ اللي عطيتنا روحك القدّوس تا يملّينا من حُبَّك اللي بيحوِّلنا، من معمَّدين لتلاميذ، ومش بس بيرويلنا عطشنا، ولكن عطش العالم كمان.

يا ربّ، بدنا ياك ترشدنا تا نكتشف شو عطيتنا من نِعَم ومواهب، مش تا نفتخر فيها ولكن تا نوَظِّفا بخدمة كلّ إنسان بحاجة للمسة حنان ولقلبك وحُبَّك.


ومتل ما قدَّمت حالك ذبيحة يا ربّ، نحنا كمان بدنا نقدِّملك ذواتنا ذبيحة تليق فيك يا إلهنا الحبيب.

/الخوري يوسف بركات/