منرفعلك يا ربّ السما والأرض كلّ التسبيح والمجد والإكرام ، ومنشكرك عا حُبَّك العظيم تجاهنا.

يا ربّي يسوع، إنتَ اللي علَّمتنا إنّو ما مُمكِن للظلمة، قد ما كانت قويِّة وصعبة، إنها تحجب النور قد ما كان صغير وخفيف.

يا يسوعنا الغالي، إنتَ اللي علَّمتنا إنّو النور بيكشُف معنى كلّ الإشيا لمَّن بنورك العظيم غطَّيت ونوَّرت عتمة وظلام الخطيِّة اللي عم يحاول إنّو يلفّ حياتنا وما يخلّينا ننعم بنورك ولا لحظة.

يا ربنا يسوع، مسيحنا ومُخلِّصنا، العالم المادّي هدفو الوحيد كيف يشوِّه صورتك فينا، ويبيِّنلنا إنَّك ضعيف وما مُمكِن تكون النور اللي بينوِّر العالم.

يا إلهنا الحاضر فينا وبيناتنا، ربنا يسوع المسيح، عتمة الخطيِّة بتضيِّع الإنسان وما بتخلّيه يعرف يعيش الفرح بنورك، بس إنتَ يا ربّ ما بتقبل إننا نحنا أبناءك وبناتك إننا نعيش بالضياع.

ومِتِل ما تغلَّبِت عا إبليس يا ربّ، نحنا بنورك بدنا نتغلَّب عا ظُلمِة الخطيِّة اللي فينا.

/الخوري يوسف بركات/