منسبّحك ومنمجّدك ومنعظّمك يا ربّ، بصباح هالنهار المبارك اللي فيه عم نتذكَّر إستشهاد القدّيس أسطفانوس.

منتأمَّل اليوم بالشهيد أسطفانوس، هالمثال لكلّ واحدة وواحد مِنّا كيف كان مندفع تا يعلُن البشارة بقيامتك يا ربّي، وشو حلو ومهمّ برسالتنا إننا نتمثَّل فيه وناخُد مِنّو هالإندفاع يا يسوعنا الحبيب.

منتأمَّل اليوم بالشهيد أسطفانوس اللي واجَه كلّ اللي رفضوك يا ربّ وشكَّكو فيك وقتلوك، وما قِبِل يتراجع عن إيمانو فيك، ومِنّو منتعلَّم كيف نواجه، بقوِّة الروح القدس، التجارب اللي عم يحَطّا الشيطان تا يبعِّدنا عنَّك.

منتأمَّل بالشب أسطفانوس اللي ما كانت الحياة سايعتو، كيف تخلّى عنها وعن ملذّاتا تا يحصل عالأهمّ وهوّي الحياة معك يا ربّ، ومِنّو منتعلَّم كيف نميِّز بين المُهِمّ والأهمّ، ونعرف نختارك الأساس والهدف والغاية لحياتنا.

ومن هالقدّيس الشهيد وأوَّل الشُهدا، أسطفانوس ، مناخُد العبرة وهيّي إنّو العالم مَنّو شي من دونك يا ربّ.

/الخوري يوسف بركات/