بصباح هالنهار المبارك، منرفعلك التسبيح والتمجيد يا إله السما والأرض، ومنشكرك عا كلّ نِعَمَك وعطاياك اللي بتفيضا علينا من ينابيع حُبَّك اللي ما بتنشِّف.

قدَّيش مهمّ على الإنسان يا ربّ إنّو يكون فاتح قلبو وعقلو وفكرو عا كلامك، متل ما كان عامل القدّيس يوسف اللي كان كلّ حياتو مستسلم لمشيئتك، لهيك عمل متل ما طلبت منو عا لسان الملاك إنّو يرجع بالربّ يسوع الطفل عاليهوديِّة.

قدَّيش مهِمّ على الإنسان إنّو ينفتح عا مشروعك الخلاصي لإلو، متل ما كان القدّيس يوسف اللي تخطّى الأمور الحياتيِّة ورغبات هالعالم، تا يلتحق فيك ويثبت عا تعاليمك يا ربّي يسوع.


معك يا ربّ ممكن للإنسان إنّو يعيش رمزيِّة الأحلام ولو هوّي واعي، إنتَ اللي بتكشفلنا ذاتك بطُرُق بتتخطى طاقتنا البشريِّة.

معك وفيك يا ربّي يسوع، منقدر نقرا تدخُّل الله الثالوث بواقعنا، لهيك منسلّمك كلّ لحظة من لحظات حياتنا.

/الخوري يوسف بركات/