شو حلو النهار اللي بيبلِّش صباحو مليان نور مِنَّك يا إله النور، إنتَ اللي بتنوِّرلنا إيّامنا وحياتنا يا ربّ الأرباب.

يا يسوعنا الحبيب، إنتَ الكلمة اللي تنازلت عن عرش مجدك وصُرت إنسان وسكنت بيناتنا، وعِشت متلنا، وشابهتنا بكلّ شي ما عدا الخطيِّة، كيف ما بدنا نحِبَّك ونعظّمك ونشكرك على حُبَّك اللامحدود تجاهنا؟ 


يا يسوعنا الحبيب، إنتَ اللي دخلت تاريخنا تا تعطينا الخلاص، وتفتحلنا باب الملكوت ونتنعَّم بالحياة الأبديِّة معك بعد ما نغادر هالحياة الفانية، كيف ما بدنا نمجّدك ونرفعلك كلّ الشكر على تواضعك المُحِبّ ولأنَّك، بكلّ مرَّة منتقرَّب مِنَّك، بتعطينا القوِّة تا نضلّ عايشين معك ولإلك بنعمة من الروح القدس.

يا يسوعنا الغالي، إنتَ اللي أخدت جسدنا الفاني تا تعطينا جسدك ودمَّك اللي مِنّو مناخُد الحياة ومنعيش الوِحدِة معك وفيك.

لهَيك صارِت مسؤوليِّتنا كبيرة إننا نحافظ عا وحدة هالجسد اللي لبسناه بالمعموديِّة، ونقدِّملك قلوبنا وحياتنا تعبير عن شكرنا إلك يا ربّ.

/الخوري يوسف بركات/