صحيح يا ربّ إنّو الفراق والوداع بيسبِّبو حزن وألم، بس فراقك والحزن عا غيابك بالجسد عن تلاميذك هوّي الوحيد اللي رح يتحوَّل لفرح لأنَّك رح تبقى حاضر معن بشكل آخر.


من بعد قيامتك من بين الأموات يا ربّ صار حضورك دايماً حضور سرّي بثلاث أماكن أساسيِّة وجوهريِّة : بالكلمة وبالأسرار وبالقريب.


إنتَ يا ربّ حاضر معنا من خلال الروح القدس البارقليط، المُعزّي لهيك وعدت تلاميذك ووعدتنا بأنَّك راجع ورح نفرح بحضورك وما ممكن حدا يقدر ينزع مِنّا هالفرح.


يا ربّي يسوع، نحنا أبناءك، أبناء الفرح اللي ما بيزول قد ما إشتدِّت الصعوبات وقُويت الأحزان اللي عم بتجرِّب تحوِّطنا بهالعالم.


تعا يا روح الله وإملك عا حياتنا وأعمالنا ونشاطاتنا، لأنَّك إنتَ القادِر على إنَّك تعطينا الفرح وتدخِّلنا بعلاقة الحبّ الحلوة بألله الآب والإبن.

/الخوري يوسف بركات/