قدَّيشنا بحاجة يا ربّ لحبّ مليان صدق؟

قدَّيشنا بحاجة لتواضع عميق وحقيقي؟


قدَّيشنا بحاجة إننا نقول الحقيقة متل ما هيِّي بكلّ إحترام وبحسب قلبك، ومن دون تلفيق أخبار وقُصص عالآخرين؟


شو بينفعنا، يا ربّ، إننا نحبّ وما نكون عم نحكي الحقيقة بصدق؟

أكيد رح منكون عم نساوم ونجامل.


وشو بينفعنا، يا ربّ، إننا نحكي الحقيقة من دون ما تكون المحبِّة غامرة قلوبنا؟

أكيد رح بتكون دينونتنا قاسية.


شو حلوة وعميقة ونافعة وهادفة حياتنا لمَّن بتكون عم تِتَّوَّج بالمحبِّة المرافقة للحقيقة، وما بدنا نكون متل الفرِّيسيِّين نرفض التوبة والمحبّة.


يا ربّ، زيدنا من مواهب روحك القدّوس، واعطينا على إننا نعيش المحبِّة متل ما إنت بتطلب مِنَّا، وما نساوم عالحقيقة، ونحكي الصدق بكلّ أمانة ومحبِّة وبهدف خلاص الآخرين.

/الخوري يوسف بركات/