سبحانك يا ربّي يسوع، معك ما في حدود للمغفرة، لأنّو عندك كمان ما في حدود للمحبِّة.


بيكون عم يسألك بطرس والرسل، ونحنا منن، عن حدود المغفرة، ومفكّرين إنَّك رح تجاوب بمرحلة أو بعدد معيَّن، وبيِجي جوابك إنّو لازم نسأل حالنا قدَّيش منحبّ، ساعتا منعرف قدَّيش طاقتنا عالمغفرة.

فالمغفرة مشروطة عندك بالمحبّة.


ونحنا منعرف، وكلنا ثقة، إنَّك بتسكب علينا غفرانك بلا حدود، بس نحنا ما عم نجرِّب نستفيد مِنّو لأننا أنانيِّين.


وتا نقدر نغفر كمان لازم نقبل إننا نحنا نتوب ونطلب المغفرة مِنَّك يا ربّ أوَّل شي تا نقدر نتقبَّل توبة الآخرين اللي خُطيو بحقّنا.


وتا نقدر نفهم كيف نغفر من كلّ قلبنا، ما فينا إلّا ما نطلب روحك القدّوس تا يملّينا مِن حُبَّك يا ربّ ونتنعَّم بغفرانك، ونتلذَّذ بالفرح اللي رح نحسّ فيه.


ونحنا اللي، كلّ يوم، عم نختبر غفرانك لإلنا يا ربّ، عطينا القوِّة والشجاعة والتواضع تا نغفر لبعضنا.

/الخوري يوسف بركات/