منسبّحك ومنشكرك يا ربّ عا كلّ نِعَمك وعطاياك اللي بتنعم فيون علينا، وعا حضورك الدايم معنا.


متل ما بيقول المتل إنّو الصبر هوّي مفتاح الفرج، هيك كمان معك يا ربّ وبطريقة تانية منتعلَّم مِنَّك إنّو الصبر هوّي مفتاح الخلاص.


بس عا شو بدنا نصبر يا ربّ بهالإيام وبهالظروف الصعبة؟

عا شو بدنا نصبر إذا كان كلّ شي ماشي بعكس ما إنتَ بتدعي الناس إنُّن يعيشوه؟

عا شو بدنا نصبر بوقت اللي كلّ اللي بيشوفونا عم نحاول نطبِّق تعاليمك بحياتنا بيعتبرونا مش طبيعيِّين أو إجرينا طايرين أو عم نمثِّل.

عا شو بدنا نصبر يا ربّ والشيطان واقف تا يفترسنا بكلّ الطُرُق من خلال إرتكاباتنا للخطيِّة ولو حتَّى من دون وعي وقصد.

بدنا نصبر عا كلّ شي بيبَعِّدنا عنَّك لأننا أبناءك وبناتك يا ربّ، بس مش حَيَلّا صبر، الصبر المليان من حُبَّك.

/الخوري يوسف بركات/