بصباح هالنهار المبارك اللي منعيِّد فيه عيد مار يوحنا المعمدان، منسبّحك ومنمجّدك يا ربّي يسوع.


عظيم إنتَ يا ربّ، إخترت يوحنّا قريبك تا يكون النبي الأخير اللي رح يحضِّرلك الأرضيِّة تا تتجسَّد وتصير إنسان مِنَّا ومعنا، ونحنا بدورنا رح نكون على مثالو، بإيماننا الثابت، أرض خصبة تا تتجسَّد فيها.



يوحنا المعمدان اللي سلّمك كلّ حياتو تا تكون إنتَ القدوة والهدف، ونحنا بدورنا رح نكون عم نحطَّك إنتَ الأساس والغاية اللي منسعى لإلها.


يوحنَّا المعمدان اللي تخلّى عن المجد اللي كان ممكن إنّو يحصل عليه تا يكون عم بيدلّ الناس عليك، ونحنا يا ربّ عم نحاول إننا نتخلّى عن كلّ شي بيعلِّقنا بملذّات هالعالم الأرضي تا نثبت فيك.


يوحنَّا المعمدان المعلّم اللي عرف إنّو هوّي تلميذ بمدرستك يا ربّ، ونحنا بدورنا غايتنا إننا نكون تلاميذك، نسعى على إننا نرضيك ونفرِّح قلبك يا ربّ.

/الخوري يوسف بركات/