بصباح هاليوم المبارك منرفعلك كلّ التسبيح والتمجيد يا ربّي يسوع.


شو هالمهمِّة الصعبة اللي بعتتن فيا لتلاميذك، ونحنا من بيناتن، إننا نبشِّر فيك وبكلمتك بين العالم اللي ما بترحم، وخصوصي اللي مَنُّن قابلين يعترفو فيك.


بس كمان في ذئاب كاسرة وأساسيِّة بحياتنا وهيّي ذاتنا، بشهواتا وبغرائِزا.


دايماً بتحاول تنهش فينا الفضايل اللي زرعتا فينا، وأهمّا فضيلة الصدق والبراءة، ومنصير نغرق بالشرّ بالفكر وبالقول وبالفعل.


كمان يا ربّ عم نتصارع مع ذئب الأنانيِّة والكبريا والكراهية والغضب اللي بيحاولو يشدّونا على إننا نتملَّك كلّ شي منشوفو ، وبيصيرو ياخدو مننا أجمل الفضايل اللي زرعتا فينا وهيّي التواضع والمحبِّة والرحمة والفرح.


بس نحنا معك يا ربّ، وبقوِّة روحك القدّوس، رح نتغلّب عليها بحياتنا، ونشهد لإلك بكلّ صدق وأمانة.

/الخوري يوسف بركات/