بصباح هالنهار المبارك، بدنا نشكرك يا ربّ عا كلّ عطاياك اللي ما بتنعدّ واللي بتخلّينا نكون رُسُل حقيقيّين عا مثال الرسل الـ ١٢ اللي إنتَ إخترتن.


بدنا نشكرك اليوم مع الرسل الـ ١٢ عا محبّتك الجامعة والكبيرة لكنيستك اللي إفتديتا بدمَّك عالصليب، وعا محبّتك الفرديِّة اللي بتخصّ فيا كلّ واحد وواحدة منّا وبتجعلنا، من خلالا، جسدك السرّي.


بدنا نشكرك يا ربّ مع الرسل الـ ١٢ لأنَّك وثقت فيون بالرغم من ضُعفُن، وبعدا ثقتك فينا لهلّق كبيرة بالرغم من خطايانا.


بس نحنا، وبكتير من الأوقات ، منخلق هاوية بيننا وبينك نتيجة إستهتارنا وضياعنا ووسخنا اللي عمّرو حيطان تا تحاول تمنعنا مِنَّك ومن حُبّنا إلَك.


يا ربّ، ما بدنا شي يفصلنا عنَّك، وبدنا ياك تكون حاضر معنا تا نقدر نواجه كلّ الصعوبات بفرح الروح ونكون كلنا أخوة فيك، بالرغم من كلّ الإختلافات بالرأي بيناتنا.


أملنا ورجانا هنّي إنَّك تضلّ معنا وفينا لآخر لحظات حياتنا.

/الخوري يوسف بركات/