يا ربّي يسوع، تحقَّقِت وعودك اللي وعدتنا فيا وحلِّت السما عالأرض من لمَّن تركت الروح القدس بيناتنا ومعنا.


يا ربّي يسوع، مع الروح القدس، اللي طلبت من الآب يبعتلنا ياه تا يكون معنا، وُلِدنا الوِلادة الجديدة متل ما قلتللو لنيقوديموس.


يا ربّي يسوع، بالعماد بالميّ والروح صرنا منتميين لعيلتك الثالوثيِّة، صرنا أبناء وبنات الآب والإبن والروح القدس.


يا ربّي يسوع، كلامك كِلّو حياة وحقيقي وواقعي.


إنتَ اللي نبَّهتنا على إنّو مولود الجسد رح يبقى جسد لأنّو آخرتو التراب، بينما المولود من الروح القدس ما ممكن إلَّا ما يكون هدفو الله.

وعلينا نحنا إننا نختار.


يا ربِّي يسوع، كَحِّل عيوننا بنور روحك القدّوس تا نعشق دربك عاطول ونضلّ عم نسعى إننا نبتعد عن ظلمة هالهالم الفاني وملذّاتو الفارغة.

/الخوري يوسف بركات/