بصباح هالأحد المبارك منرفعلك آيات الحمد والتمجيد والشكر يا إلهنا الحبيب.


عظيم إنت يا ربّ كيف بتواضعك الحقيقي جذبت الناس لإلك، وبمحبتك اللي ما إلها حدود غفرت ليلّلي خانوك وأهانوك وصلبوك وقتلوك.


عظيم إنت يا ربّ، كيف جيت وغيَّرت حالة الكون كلّو بهدوءك المليان حبّ ورحمة وحنان.


جيت تعلن إنّو قوِّة الإنسان باطلة والعنف ما بيفيد، وإنّو خلاص العالم كِلّو ما بيصير إلّا بروح السلام والمحبِّة وبالخدمة المجّانيِّة.


عظيم إنتَ يا ربّ، كيف إنَّك إنتَ إبن الله الآب، نزلت من علياءك وصرت خادم لإرادتو عا هالأرض. 

إنت الإله المُسالم اللي ما بتخاصم ولا بتأذي حدا.

إنتَ اللي عرَّفتنا عا الله الآب اللي خلقنا من فيض حُبّو قدّيسين بس نحنا بادلناه هالحبّ بالخطيِّة وبالضعف.


اليوم، رح منقدِّملك أهمّ ما عنّا : 

عقولنا وقلوبنا، وما بدنا شي إلّا نحبَّك ونرضيك بأعمالنا يا إلهنا الحبيب.

/الخوري يوسف بركات/