بصباح هالنهار المبارك، منرفعلك يا ربّ كلّ التسبيح والتمجيد والشكر عا هالليل اللي مرق علينا، وعا هالنهار اللي رح يمرق علينا.


بكِلّ مرَّة كنت تقعد فيها مع تلاميذَك، يا ربّ، كنت تعلِّمُن، وهنّي بدورن يعلّمونا، كيف يصلّو.


ومش بس يصلّو، كمان علَّمتن وبتعلّمنا كيف يكون عنّا ثقة فيك إنّن رح تحقّقلنا طلباتنا، بس مش حَيَللا طلبات.


ما بعرف قدَّيش عنّا ثقة فيك يا ربّ تا منفكّر إنَّك ما عم تستجيب لطلباتنا، والمشكلة الأساسيِّة هيّي فينا لأنّو أغلبيِّة طلباتنا مادّيِّة وما عم بتكون روحيِّة.


واليوم منسمعك عم بتشدِّد علينا يا ربّ تا نطلب مِنَّك الأساسي والجوهري، ونلحّ بطلبنا لتحقيقو، وما نكون غرباء عنَّك، لأنَّك إنت بيّنا وإلهنا ومُخلِّصنا.


اليوم، ما بدنا يا ربّ إلّا إنَّك تشملنا برحمتك وتغمرنا بحنانك، وتغفرلنا كلّ هفوة إرتكبناها ونسينا، او تناسينا، إننا نسلِّم ذاتنا للروح القدس.


بدنا نحسّ فيك بيناتنا، ونشعل بنار حُبَّك اللي مغلَّف كلّ حياتنا.

/الخوري يوسف بركات/