ببداية هاليوم المبارك، منرفعلك يا ربّ قلوبنا وأفكارنا تا تباركا ونعرف نسبّحك متل ما بيليق فيك.


ممكن الإنسان يستغرب من سؤال تلاميذك لإلك يا ربّ وطلبُن منَّك إنَّك تعلِّمن كيف يصلّو، لأنُّن كانو ضايعين بين كيف بتتطلَّب مِنُّن الشريعة الصلاة ومن طريقتك إنتَ بالصلاة لبيَّك السماوي.


وياما أوقات كتير منضيع بعدد حبَّات المسبحة أو بكتب الصلاة وما منعود نعرف شو بدنا نصلّي، بينما الصلاة الأساسيِّة اللي علّمتا لتلاميذك هيي إننا نناجيك يا إلهنا الحبيب، ونمجِّد الآب السماوي، ونشكر الروح القدس الحاضر فينا ونسبِّحكُن، ونطلب حضور إمَّك العدرا مريم معنا، ونتأمَّل بحياة القدِّيسين ونطلب شفاعتُن وصلاتُن تا نكون عم نعرف نعيش حياتنا بحسب مشيئتك.


أجمل ما ممكن نصلّيه، ونفتح علاقة معك يا ربّ، هيّي صلاة الأبانا اللي علَّمتا لتلاميذك، واللي فيها كلّ شي : المناجاة والتسبيح والتمجيد والشكر والطلب.

/الخوري يوسف بركات/