كل ما بتشرق شمسك علينا يا ربّ، منتأكَّد من حضورك الدايم معنا ومنشعر بدفئ حنانك علينا.


وعا قد منَّك بيّ حنون يا ربّ، قلبك ما بيرفض طلباتنا نحنا ولادك، بس شرط إنّنا نكون عم نعرف شو نطلب، وتكون طلباتنا لخيرنا ولتمجيد إسمك.


وعا قد منَّك بَيّ رحوم، قلبك بيرقّ علينا نحنا ولادك الضُعَفا اللي ما عم نعرف شو بدنا بهالحياة، وأكتر طلباتنا عم بتكون مادّيِّة ومش روحيِّة.


يا ربّي يسوع، أوَّل طلب منطلبو منَّك هوّي إنَّك تبقى معنا لو مهما ضعفنا وأغوتنا ملذّات العالم.


تاني طلب منطلبو مِنَّك يا ربّ، هوّي إنَّك ما تحرمنا من اللقاء فيك بسرّ القربان المقدَّس ومن إننا نتناولك، إنت خبز الحياة، بالذبيحة الإلهيِّة.


تالت طلب هوّي إنَّك تساعدنا على إننا نغفر لكلّ إنسان أخطأ بحقّنا تا نستحقّ إنَّك تغفرلنا خطايانا.


ومنطلب مِنَّك إنَّك تنجّينا من الشرّير وتَجاربو، لأنَّك إنتَ وحدك الحيّ والمالك للأبد عا حياتنا.

/الخوري يوسف بركات/