منسبّحك ومنمجّدك يا ربّ بصباح هالنهار المُميَّز واللي فيه بتعيِّد الكنيسة المارونيِّة وبتتذكَّر وبتكرِّم القدّيسة مارينا.


من مارينا، هالقدِّيسة اللي عاشت الألم بصمت، ألم الشتم والإهانات، كرمال تبقى ببيتك يا ربّ، منتعلَّم كيف نصبر عالآلام والمِحَن والصعوبات اللي عم نواجِها اليوم، وهالشي حُبًّا فيك.


من القدِّيسة مارينا، هالتلميذة اللي كانت عم تتمثَّل فيك يا ربّ بالتواضع والوداعة وتسامح كل اللي افترو عليها، منتعلَّم كيف نحِبّ الآخرين ونغفر لكلّ مين عم يأذينا، ونعرف إنُّو التواضع والوداعة هنّي أساس حياتنا معك وتلمَذِتنا لإلك.


من القدّيسة مارينا، هالراهبة اللي عرفِت تختارك النصيب الأفضل وتسلّمك ذاتا تا تكون وحدك الملك والحبيب والعريس يا ربّ، منتعلّم كيف نستسلم بكُلِّيِّتنا بين إيديك ونآمن إنّو معك منلاقي السعادة والفرح الأبدي، ونكون دايماً مستعدّين تا نلتقي فيك.

/الخوري يوسف بركات/