بهالصباح المبارك منرفعلك يا ربّ قلوبنا وأفكارنا وعقولنا وحواسنا تقدمة حبّ وشكر إلك.


كلمتك يا ربّ هيِّي الرفيق الأساسي للإنسان، على مدى الأجيال، من بداية التكوين ليومنا هلَّق ولأبد الآبدين، شرط إنّو يآمن بفعاليِّتا بحياتو.


كلمتك يا ربّ هيِّي المقياس الوحيد للإنسان وفيها بينما وبيتطوَّر وبيلاقي السعادة لحياتو ولرسالتو عا هالأرض، شرط إنّو يستسلم لإرادتك بحياتو. 


كلمتك يا ربّ هيِّي اللي بتحطّ حدّ لكل الصراعات اللي عم بتصير بالعالم وبالمجتمعات وبتخلّي الإنسان يتعالى عن الإستبداد والإستعباد، شرط إنّو يشوف فيها دعوة للمسامحة والأخوِّة.


كلمتك يا ربّ هيِّي الحياة اللي نفختا وكوَّنت فيها الإنسان وصيَّرتو عا صورتك ودعيتو تا يكون عا مثالك بالحبّ والتواضع والوداعة، شرط إنَّك تكون إنتَ الأساس بحياتو.


منعلنك إلهنا ومخلِّصنا يا ربّ، ثبِّتنا فيك وبتعاليمك.

/الخوري يوسف بركات/