مع إطلالة هالصباح، ومع نور الشمس اللي عم تشرقو علينا يا ربّ، منرفعلك كلّ التسبيح والمجد.


قوي كلامك اليوم يا ربّ لإلنا، وبيحطنا قدّام واقع مهمّ لحياتنا وهوّي إننا رح نِتحاسب على كلّ كلمة منقولا، وعلى كلّ عمل منقوم فيه.


يا ربّ، إنتَ اللي علَّمتنا، بحياتك عالأرض، إنّو الكلمة الكاذبة ما فيها حياة، وبتشهد علينا بإننا أبناء وبنات إبليس بيّ الكذّابين.


ومتل ما الثمرة هيّي خلاصة الشجرة، هيك لازم تكون الكلمة خلاصة لحياتنا والثمرة لأعمالنا يا يسوع.


يا ربّ، قدَّيش في أشخاص لسانن عم بيدينن لأنُّن ما عِرفو حَطّو حدود لكلماتن.


يا ربّ، نجِّينا من النميمة ومن تشويه سمعة الآخرين ووعظ عن الإشيا اللي ما منعيشا، وأعطينا نعمة فحص الضمير تا نعيش اللي منقولو وننما بمواهب الروح القدس.

/الخوري يوسف بركات/