مع إطلالة هالصباح المبارك، منرفعلك يا ربّي يسوع أعذب ألحان المجد والتسبيح والشكر عا محبّتك الكبيرة اللي بتحبّنا ياها.


بدنا نشكرك اليوم يا ألله، الآب القدّوس، لأنَّك بيَّنتلنا مدى حُبَّك اللي ما إلو حدود لإلنا لمَّن بعتِّلنا إبنك الحبيب يسوع المسيح.


بدنا نشكرك عا نعمة البنوِّة اللي فيها تأكَّدنا إننا أبناءك وبناتك الحقيقيّين، إنت بيّنا السماوي والملك عا حياتنا.


بدنا نشكرك ونعظّمك يا يسوعنا الحبيب، اللي قبلت إنَّك تتجسَّد وتسكن معنا وفينا تا تغنينا، وقدَّست أجسادنا ونفوسنا من جسدك الحيّ ودمك اللي بيحيي.


منشكرك يا ربّ على خلاصك لإلنا، إنتَ اللي بموتك وبقيامتك ولدتنا للحياة الأبديِّة بالمعموديِّة المقدَّسة.


نمّيلنا قلوبنا بالإيمان فيك يا ربّ تا نعرف نشتاق للملكوت السماوي اللي محضّرو لكلّ إنسان عم يعرف يحطَّك البداية والنهاية لحياتو، ونوِّرنا بكلمتك تا نعرف نشهدلك بحياتنا إلهنا وبيّنا وخيّنا وحبيبنا للأبد.

/الخوري يوسف بركات/