صباح العدل والرحمة والأمانة هوي صباحنا اليوم معك يا إله المحبِّة.


ربّي يسوع، منتأمَّلك كيف كنت عم بتلوم الكتبة والفرّيسيّين، اللي كانو عايشين ديانتن عالهامش وبيهملو أهمّ تعاليم الشريعة اللي هيّي العدل والرحمة والأمانة.


منتخيَّلُن كيف كانو مغيّبين العدل من حياتن لأنّو بيطالن بسبب طمعُن وجشعُن وتحميلن للناس قوانين عا حسب أهواءن.


ومنتوقَّف عند حياتنا نحنا كيف عم نكون، بكتير من الأوقات، متل هالكتبة والفرّيسيّين منعيش الفوقيّة مع أخوتنا، ومنصيّر حالنا المرجع ومنتناسى إنَّك وحدك أساس حياتنا.


كان الكتبة والفرّيسيّين عم يهملو الرحمة، لأنّها بتعرّيهن وبتحطن قدّامك وقدّام ذاتن، وبيصيرو يشوفو بشاعة أعمالُن.


وهيك نحنا كمان بكتير من المواقف عم نكون متلُن ما عم نرحم بعضنا.


والويل لإلنا إذا مَنَّا عم نعيش الأمانة لكلامك يا ربّ.

/الخوري يوسف بركات/