بهالأحد المبارك، وبهالصباح اللي عم تدعي فيه زكّا العشّار تا يستقبلك عندو، منرفعلك التسبيح والتمجيد يا إلهنا الحبيب.


بهاليوم اللي عم تعطي فيه الخلاص لبيت زكّا، اللي كان عشّار وخاطي قبل ما بلتقي فيك، منطلب مِنَّك إنَّك تفوت عا قلوبنا وتسكن فيها وتبارِكا وتخلِّصا تا تصير بيتك ومن خلالو بتشعّ نورك عالآخرين.


بهاللحظة اللي إنطلق فيها زكّا لعندك تايب وبقلبو وبفكرو وعد إنّو يعطي لكلّ مين إلو حق عليه حقّو، نحنا كمان مننطلق بقلب منسحق وتايب صوبك تا تحوِّلنا أفكارنا وعقولنا تا تصير تفكِّر فيك وحدك وتحِبَّك بكلّ إنسان منلتقي فيه.


ومتل ما زكّا اللي تاب، بكلمة مِنَّك، عن كلّ أفعالو ونظراتو اللي أهانت الناس وإحتقرتا، نحنا كمان بدنا ياك تحوِّلنا نظراتنا تا ما نشوف إلَّا الجمال بظلّ بشاعة اللي عم بيصير معنا، وما نفكِّر إلَّا بالخير رغم كلّ التحدِّيات الصعبة والمُتعِبة اللي عم بتواجهنا.

/الخوري يوسف بركات/