منسبّحك ومنمجّدك ومنعظّمك يا ربّ بصباح هالنهار المبارك اللي عم تشرق فيه علينا نورك.


وبهالنهار، اللي عم بتطمِّننا فيه بإنَّك حاضر معنا، منعترف فيك السيِّد عا حياتنا، ومنعلنك المالك وحدك عا قلوبنا، ومنقلَّك إننا منحبَّك يا إلهنا الحبيب.


كيف ما بدنا نعترف فيك ربّنا وإلهنا، وإنتَ اللي إعترفت فينا إننا أحبابك، رغم كلّ اللي عملناه وبعدنا عم نعملو من إهانات بِحقَّك؟


كيف ما بدنا نعتبرك السيِّد عا حياتنا، وإنت اللي عطيتنا الحياة وما بخلت علينا بالنِعَم والمواهب والوزنات يا ربّ السما والأرض؟

كيف ما بدنا نِعلنَك المالك وحدك عا قلوبنا، وإنتَ اللي حبَّيتنا حُبّ ما إلو حدود، حتَّى وصُلت بِحُبَّك لدرجة إنَّك إنهِنت وإنصلبت ومِتِت كرمالنا، ولأنَّك بتحبّنا.


وكيف ما بدنا نبادلك هالحبّ الحقيقي، وإنتَ اللي عم تدعينا بكلّ لحظة تا نحبَّك ونسلّمك الدفِّة تا تقود سفينة حياتنا يا إلهنا الحنون؟

/الخوري يوسف بركات/