منسبّحك ومنمجّدك ببداية هالأسبوع المبارك يا ربّنا وإلهنا يسوع المسيح.


عظيم إنتَ يا ربّ، كيف بتعطينا العِبرة من الأمثال اللي بتحطّنا قدّام ضميرنا وقدّامك تا نشوف حالنا وين رايحين بطمعنا وبأنانيِّتنا اللي عم تحجُب عَنّا كلامك اللي بيحذِّرنا دايماً منها.


شو صعب عالإنسان البعيد عنٌّك يا ربّ إنّو يعيش حياتو ويقتنع فيها متل ما هيّي.


دايماً الطمع بيعميه وبيصير بدّو يخزِّن غلّاتو، مع إنّو منّو ضامن لحظة واحدة من حياتو.


بينما الإنسان المسلِّم ذاتو بين إيديك يا ربّ، بتهون عليه الحياة كيف ما كانت لأنّو بيصير هدفو عا هالأرض كيف يعيش التحضير للقاءو معك بعد ما يترك هالعالم الفاني.


شو صعب عالإنسان البعيد عنَّك يا ربّ إنّو يحصل عالسعادة الحقيقيِّة، وبالمقابل الإنسان العايش معك يا ربّ، ما في لزوم يفتِّش عالسعادة الحقيقيِّة لأنّو فيك عم بيلاقي كلّ شي بيطلبو وبيتمناه.

/الخوري يوسف بركات/