بهالصباح المبارك، ومع نهاية هالأسبوع، منرفعلك يا ربّ أجمل ألحان التسبيح والشكران على حضورك معنا بكل يوميّات حياتنا.


يا ربّي يسوع، إبليس الكذّاب حاول إنّو يفوت ببطرس والرسل، وبيسعى دايماً إنّو يعرقل كلّ اللي مقرّرين وعم يمشو بطريقك تا يبعِّدُن عن الخلاص اللي وعدتن فيه.


يا يسوع، بطرس اللي إختبر هالضعف البشريّ والتجربة بيعلّمنا وبينبّهنا إنّو من دونك رح نوقع بشرّ إبليس اللي عم بيحاول يغرينا بقوّتنا الشخصيِّة والبُعد عنَّك.


بس إنتَ يا ربّ وعدت بطرس والتلاميذ وبتوعدنا إنَّك ما رح تتركنا ورح تضل معنا وحامينا تا ما نفقد إيماننا، ونثبت فيك تا نقدر نقوّي ونشدِّد بعضنا البعض.


ثقتنا فيك كبيرة يا ربّ بإنَّك رح بتتمِّم عملك الخلاصي بكل واحد وواحدة فينا، ورح نشتغل على ذاتنا تا تزيد محبِّتنا ونكون أنقياء تا نثمر ثمار بتليق فينا كأبناء وبنات الملكوت.

/الخوري يوسف بركات/