بهالصباح المبارك، المليان من نِعَمَك وعطاياك يا ربّ، منسبّحك ومنمجّدك.


من شو بدنا نخاف يا ربّ ونحنا كلنا ثقة فيك إنَّك حاضر معنا بكلّ تفاصيل حياتنا؟


من شو بدنا يا ربّ نخاف ونحنا عارفين ومتأكدين إنَّك حامينا من كلّ تجارب الشرّير؟


من شو بدنا نخاف يا ربّ ونحنا كلنا إيمان بإننا رح نلتقي فيك بعد ما تنتهي حياتنا الفانية؟


إنتَ فرحنا وسعادتنا يا ربّ، ومن دونك الحياة ما بيعود إلها طعمة ولا لون.


إنت أملنا ورجانا يا ربّ، ومن دونك اليأس بياكِلنا ومنصير أجساد بلا روح.


إنتَ كنزنا الوحيد يا ربّ، ولو شو ما عملنا وقد ما جمعنا من كنوز بتبقى فارغة من دونك.


وإنتَ غايتنا وهدفنا بالحياة يا ربّ، قلوبنا ما بترتاح إلّا فيك لأنَّك وحدك اللي بتعطينا القوِّة تا نقدر نواجه كلّ الصعوبات اللي عم نواجِها بهالإيَّام.

/الخوري يوسف بركات/