يا يسوع الحبيب، بتعلِّمنا دايماً إنّو العمل بمشيئة الربّ بيخلّي حبّنا لألله يتجسَّد ويصير حقيقة وواقع منعيشو بحياتنا.


كل حياتك عالأرض، ركَّزت عيونك على الآب السماوي تا تتبنّى مشيئتو وتعمل فيا بكلّ أمانة وبطاعة حبّ مطلقة.


ولأنَّك بتحبّ الإنسان يا ربّ، وتجسَّدت عالأرض بفعل الحبّ الإلهيّ، بتريد إنّو العالم كلّو يعرف مدى عظمة هالمحبِّة اللامحدودة بينك وبين الآب والروح القدس.


وكلامك واضح يا ربّ إنّو اللي بيحبّ ما في الَّا ما يعمل مشيئة اللي بيحبّو، وهيدا هوي الحبّ الملتزم ومش حبّ العواطف العابرة.


نحنا منحبَّك يا ربّ، من كلّ قلوبنا وعقولنا وأفكارنا، من كلّ كياننا.


ساعدنا على إننا نصدِّق أكتر وأكتر كلامك ونحبّ مشيئتك ونِقبَلا متل ما هيٍي، ولو بأوقات بتكون مؤلمة، ونعمل فيها تا تحيا إنتَ فينا.

/الخوري يوسف بركات/