مبارك إنتَ يا ربّ السما والأرض لأنَّك عم تشرق شمسك علينا وتنوِّرنا بنورك الإلهي.


شو هالنار اللي جيت تلقيها عالأرض يا رب؟

نار المحبِّة، نار السلام ونار الطاعة والتواضع اللي عِشتُن بيناتنا.


هيدي هيّي النار اللي كلّ واحد وواحدة مِنّا تعاهدنا من وقت ما تعمَّدنا، عا إيمان أهلنا، إننا نسعى إنّو تبقى نار حُبَّك مشتعلة بقلوبنا.


شو هالتغيير اللي جيت تعملو عا هالأرض يا ربّ؟

جيت تشيلنا من عبادتنا للـ "أنا" المتحكّمة فينا.


جيت تغيِّر الإنسان القديم اللي فينا، اللي لاحق الشهوة والمركز والسلطة والمال، وتصيِّرنا تلاميذ ورُسُل حقيقيّين نعرف نعكسك بحياتنا.


شو هالدوا اللي جيت تعطينا ياه يا رب؟

ما جيت حيللا دوا بيخدم فترة وبيروح مفعولو، جيت تا تعطينا دوا أبدي وما بيفسد.


جيت وبعدك عم تعطينا جسدك ودمك وكلمتك يا ربّ.

انشالله منكون عا قد ثقتك فينا.

/الخوري يوسف بركات/