منرفعلك يا ربّ أعذب ألحان التسبيح والمجد، ومنشكرك عا هالصباح اللي شرقتو علينا.


يا يسوعي الحبيب، ضجيج هالعالم ما عم بيخلّينا نسمعك عم تحكينا، سكَّرِت دينَينا وما عِدنا نسمع صوتك الخافت بوضوح.


يا إلهنا الغالي، شهوات العالم وملذّاتو عم تعصف فينا وبكلّ محيطنا وعم بتدقّ باب قلوبنا وكلّ كياننا تا نستسلم لها وتبعدنا عنَّك.


وبتبقى وحدك يا يسوعنا، عا هالباب، بس بابنا عم بيكون مقفَّل، عم تهمسلنا بإحترام وتدعينا تا نفتحلك وترجع تخلقنا من جديد.


وحدك يا ربّي يسوع القادر إنَّك تحطّ إيديك علينا وتنعشنا وتشفينا وتجدِّدنا تا نرجع نتجاوب معك ونتأمَّلَك بصمت الحُبّ ونحملك بإيمان لكلّ اللي منلتقي فيهُن ونختبر عظمة حُبَّك بحياتنا.

/الخوري يوسف بركات/