مع كلّ نسمة هوا، ومع كلّ طلعة شمس بالنهار المبارك، منرفعلك يا ربّ كل التسبيح والمجد والإكرام.


يا ربّي يسوع، بهالفترة الصعبة اللي عم نمرُق فيها، نحنا بأمسّ الحاجة لإلك تا نفتحلك قلوبنا وتحكينا كلامك المليان أمل ورجاء.


يا ربّي يسوع، نحنا بحاجة لإلك تا تسكب فينا من ألوهيّتك ونفهم مشروعك الخلاصي لإلنا، ونمشي معك الدرب بسلام مهما كانت طويلة أو قصيرة.


يا روح الله القدّوس، نحنا بحاجة لإلك تا تسكن فينا وتقوّينا وتشجِّعنا على إننا نسمع منيح كلمة الله المليانة حياة ونعمل فيا، ونكون عا قد المسؤوليِّة اللي حمَّلتنا ياها وهيّي إننا نعكس حُبَّك للعالم كِلّو.


كون معنا يا ربّ تا نقدر نشهدلك وسط كلّ اللي عم نعيشو بحياتنا، ونعرف نستعد أكتر وأكتر للقاءك لمَّن بتدعينا، وننتقل معك لضفِّة الأمان والراحة بسلام.

/الخوري يوسف بركات/