بصباح هالأحد المبارك، منرفعلك أناشيد التسبيح والتمجيد والشكر يا إلهنا الحبيب.


قدَّيش كانت هالمرأة الكنعانيِّة عم تتعذَّب لعذاب بنتا اللي كان عم بيعذِّبا الشيطان، ومع هيدا وكِلّو ما إستسلمت لا بل بِقيِت تُبرُم عالخلاص لإلا ولبنتا ولِقيِتو عندك يا ربّي يسوع.


قدَّيش كانت هالمرأة الكنعانيِّة مؤمنة فيك يا ربّ من قبل ما تسألك الشفاء لبنتا، والنتيجة إنَّك حقَّقتِلّا مطلِبا من بعد ما شِفِت إيمانا العميق والكبير.


قدَّيش كانت هالمرأة الكنعانيِّة متأكدة من قدرتك عا طرد الشيطان من بنتا، لهيك إجت بِكُلّيِّتا وسجدت قدّامك وإعترفت فيك الملك إبن الملك والله معنا اللي جيت تا تعطي الخلاص لكلّ إنسان بيطلبو بإسمك يا ربّ.


قدَّيشنا بعاد عن إيمان هالمرأة الكنعانيِّة، نحنا اللي عم نشوفك عم تتجلّى دايماً لإلنا وناطر تا ندخّلك عا قلوبنا وعا حياتنا تا تطرد منها كلّ شي بيبعدنا عنَّك.

/الخوري يوسف بركات/