ببداية هالأسبوع المبارك، منشكرك ومنسبّحك ومنمجّدك يا ربّ.


نحنا منعترف فيك ملكنا ومُخلِّصنا يا إلهنا الحبيب، لأنَّك جيت عا حياتنا تا تخلِّصنا وتعطينا الملكوت.


إنتَ اللي سلَّمتنا ذاتك، جسدك ودمك، تا نكون رُسُل حقيقيّين وشهود حقيقيّين لإلك، نعرف كيف نحطّ حالنا بين إيدَيك وتكون إنتَ القدوة والمثال لحياتنا المسيحيِّة والهدف اللي عم نسعى كلّ حياتنا إننا نوصلّو.


ورغم هالشي بعدنا ما عم نعرف نستسلم لإرادتك القدّوسة اللي بتعمل مِنّا أيقونة حُبَّك بالعالم.


جايين لعندك يا ربّ، نحنا التعبانين من صعوبات هالحياة، ومن أمراضا الجسديِّة والروحيِّة، تا إنتَ تبارِكا وتحوِّلا لصليب صغير نحملو معك، وتقدِّسنا من خلالو.


علِّمنا التواضع يا ربّ، تا نقدر نعيش حياتنا المسيحيِّة بكلّ أمانة معك وفيك، ونعرف نحسّ بطعم الصليب اللي حملتو حُبًّا فينا.

/الخوري يوسف بركات/