بصباح هالأحد المجيد منرفعلك يا ربّ كلّ التمجيد والتسبيح والإكرام عا كلّ مواهبك ونِعَمَك وعطاياك اللي بتنعم علينا فيون.


ومن هالنِّعم والعطايا خصَّصتنا يا ربّ بموهبتين، نحنا المؤمنين فيك، وهنّي : العمل والإصغاء.


قدّيش مهمّ نكون متل مرتا بحياتنا الروحيِّة، نعرف كيف نجسِّد إيماننا فيك يا ربّ من خلال أعمالنا والإهتمام فيك بالمريض والمهمَّش والفقير وخصوصي بهالظروف الصعبة اللي عم نمرق فيها بوطننا الحبيب.


وقدّيش مهمّ كمان إننا نكون متل مريم نعرف نختار النصيب الأفضل يا ربّ واللي هوّي إننا نجي لعندك، ونقعد معك جلسات وجلسات، تحكينا فيا ونحكيك، وتعبِّرلنا عن قوِّة حُبَّك لإلنا، من خلال الكتاب المُقدَّس، ونعبِّرلك عن حُبّنا لإلك بحضورنا معك.


شو حلو هالسرّ، سرّ حُبَّك يا ربّ اللي ما بينتهي واللي بتدعينا فيه تا نبادلك هالحبّ بأقوالنا وأفعالنا.

/الخوري يوسف بركات/