مع كل إشراقة شمس بكلّ صباح منرفعلك أناشيد التسبيح والمجد والشكر يا ربّ الأرباب.


ما في أجمل وأهمّ من كلامك يا ربّي يسوع، إنت اللي بتحطنا قدّام ذاتنا وبتحمِّلنا مسؤوليِّة الرسالة اللي حاملينا وهيّي إننا نعرف كيف نعامل الناس.


قدّيش بدّو يكون عنّا من حكمتك يا ربّ تا نعرف نميِّز تصرُّفاتنا ونوجِّها للخير ولمجدك.


قدَّيش بدّو يكون عنّا الوعي تا نعرف نواجه كلّ التحدِّيات اللي عم نمرق فيا، ونتغلَّب علَيا بقوِّة روحَك القدّوس.


قدَّيش بدّو يكون عنّا من المنطق اللي كنت عم بتعلّمو لتلاميذك ولرُسُلك تا نعرف نحكي كلام إلو معنى وبيفيد ويكون هدفو تمجيدك.


ومع إننا منعرف إنّو لازم نعيش بحسب تعاليمك تا نقدر نوصل عالملكوت، بس الـ "أنا" عنّا بتحاول تتغلَّب عا إرادتنا.


لهيك منطلب مِنَّك تبقى معنا وتعطينا القوِّة تا نكمِّل معك للنهاية وما نستسلم.

/الخوري يوسف بركات/