منسبّحك ومنمجّدك ومنباركك ومنشكرك يا ربّي يسوع ببداية هالنهار اللي فيه عم تدعينا تا نترك كلّ شي بيعلِّقنا بالأرضيَّات وبالعالم ونتبعك.

وهيدا هوّي الأساس يا ربّ : إننا نتخلَّى عن كلّ شي تا نقدر، أو حتَّى نستحقّ، نكون تلاميذك، لأنّو ما ممكن إننا نكون معك وبالوقت ذاتو مع العالم.

بدنا نختار، لا بل دعوتنا نختار : يا حياة العالم واللي بتحملو من خطايا وشهوات وملذّات أرضيِّة، يا الحياة معك والصليب اللي بيرافقا.

وكلامك واضح وصعب يا ربّ، لمَّن بتنبِّهنا من التعلُّق بالعالم، وحتَّى وصلت إنَّك تحذِّرنا من التعلُّق بالعيلة وبأفرادا اللي ممكن يكونو سبب يبعِّدنا عنك، متل ما صار مع إبراهيم اللي تعلَّق بإبنو إسحق وتاه عنَّك.


منعرف يا ربّ إنّو اللي عم تحكيه كتير صعب، بس كتير من القدّيسين عاشو بحسب كلامك، ودعوتنا نتمثَّل فيهن، مش نهمل أهلنا ولكن نعرف نحطَّك الأساس بحياتنا وولا حدا وولا شي بياخد مكانك.

/الخوري يوسف بركات/