صباحي بيبتدي بحمدك وتسبيحك يا ربّ السما والأرض.


منشكرك يا ربّ عا كلامك اللي بتعلًّمنا فيه إننا نعيش القناعة اللي هيّي فيها تكون كنز لإلنا إذا نحنا بدنا.


يا ربّ عم بتحذِّرنا من الطمع لأنّو حياتنا هيّي مش بأموالنا ولو كانت كتيري.


بتعلِّمنا يا ربّ كيف نغتني فيك، وفيك وحدك منلاقي السعادة والسلام والراحة.


يا ربّي يسوع، ما تخلّي حُبّ الرِّبح يتملَّك ويسيطر عا قلوبنا وعقولنا وما نعود نعرف كيف نعيش الغِنى الحقيقي فيك، متل ما عمل الجاهل وفكَّر إنّو بتجميع المال بيحصل عا حياة ما فيها قلق، بس نسي إنّو الموت هوِّي مفتاح مهم تا نكتشف المعنى الحقيقي للحياة.


شو رح نستفيد من تخزين الخيرات والمواهب اللي عاطينا ياها؟

كِلُّن رح يبقو محلُّن إذا ما عرفنا أحسنّا إستعمالن لخيرنا وخير الآخرين.

/الخوري يوسف بركات/