بنهاية هالأسبوع المبارك منسبّحك ومنمجّدك يا ربّ السما والأرض ومنشكرك عا كلّ نِعمَك وعطاياك.


عظيم إنتَ يا ربّ كيف بتحملنا بقلبك رغم كلّ الضعف اللي لابسينو وبضعفنا منجرحك.


عظيم إنتَ يا ربّ كيف كتفك اللي حمل الصليب عم يحملنا بخطايانا اللي عم نرتكبا بحقّك.


عظيم إنتَ يا ربّ لمّن عم تترك كل شي بهالدني وبتلحق كلّ واحد وواحدة منّا لمّن منضيع بمتاهات هالعالم الضايع.


عظيم إنتَ يا ربّ لمّن بتضلَّك عاطينا الفرص ورا بعضا تا نتوب ونرجع لحضنك وتملِّكنا الفرح الأبدي معك بالملكوت السماوي.


المشكلة عم بتكون فينا يا ربّ، نحنا اللي عم نستسلم لتجارب الشرّير ونوقع بالخطيِّة اللي عم تحاول تحرمنا من الفرح فيك والعيش معك بسلام.


اليوم، قبل بكرا، بدنا نسعى إننا نرجع نعمل مراجعة لكلّ تصرُّفاتنا ونرجع نصوِّبا تا تكون لتمجيدك.

/الخوري يوسف بركات/