بصباح هالنهار المبارك، منرفعلك كلّ التسبيح والتمجيد يا ربّ السما والأرض.


يا يسوع الحبيب، قدَّيشك عظيم وقدّوس تا ما تأثَّرت بالفرّيسيّين اللي كانو عم يستهزؤو فيك لمَّن شافوك عم تتعالى عن المال والتعلُّق فيه كرمال تعلِّمن وتعلِّم تلاميذك إنّو الهدف الأسمى والأوحد هوّي كيف نُرضي الله وما نُرضي أنانيّاتنا.


ومتل ما بيقول مار بولس إنّو حُبّ المال هوّي أصل الشرور، لمسناه وبعدنا عم نلمسو من بداية الخليقة ليومنا هلَّق، ورح يبقى لأنّو الإنسان اللي ما بيآمن إنَّك إنتَ وحدك القادر على إنَّك تعطي السعادة بملآا، رح يضلّ يفتِّش عنها بعيد عنَّك، ورح يضلّ ضايع بمتاهات العالم المادّي المرتكز عا حُبّ الذات.


يا يسوع الحبيب، مِنَّك منتعلَّم كيف نتخلّى عن كلّ شي بيعلِّقنا بهالعالم.

علَّمتنا كيف نتحدّى، بالحُبّ الحقيقي الصادق، كلّ مغريات الدني بما فيها المال والثروات، بهدف اللقاء فيك بالملكوت السماوي.

/الخوري يوسف بركات/